Especificacións funcionais de Ceres

O modo campo de Ceres, pensado para o móbil ou a tableta do aplicador e do encargado: o que toca hoxe e mañá en tarxetas grandes —tratamentos coa cantidade de produto que hai que preparar, labores, regas e colleitas previstas—, o tempo desta hora cun «Pódese tratar» ben visible e un botón grande para anotar cada tarefa ao rematala. O anotado entra no caderno coas mesmas comprobacións que na oficina (carné, inspección do equipo, dose, prazo de seguridade): o rexistro faise na parcela e no momento, non a final de mes de memoria nin pasando a limpo un papel. Arriba, «O teu día» e a campá coas ordes asignadas; abaixo, o botón «Ditar» para anotar de palabra.

A finca propia da cooperativa e as dos seus socios: quen é o titular (NIF, código REA, número de socio, réxime de IVE), como cumpre a xestión integrada de pragas e que asesor a leva, que certificacións ten e cando caducan. A ficha de cada explotación reúne nun só sitio as súas parcelas, os seus cultivos, o seu caderno en liña de tempo, as súas entregas, as súas liquidacións e a puntuación do seu caderno: o que hoxe anda repartido entre a libreta do socio, a carpeta da certificadora e a folla de liquidacións, e o primeiro que pide un inspector ou un auditor.

As parcelas de cada explotación tal como as identifica a Administración: o recinto SIXPAC coa súa referencia, superficie, uso e coeficiente de regadío, e o que o caderno necesita saber de cada unha —rega, aire libre ou protexido, zona vulnerable a nitratos, zona específica, estado ecolóxico, figuras de calidade (IXP, DOP) e solo—. Vense nunha lista ou sobre a ortofoto do PNOA, cos recintos coloreados por cultivo, e a ficha garda a rotación de cultivos, o caderno e as análises de cada parcela. Co vigor por satélite (NDVI de Sentinel-2 sobre cada recinto SIXPAC) vese que parcela vai peor que a súa media e convén visitar. É a base de todo o demais: os tratamentos, o abonado e as colleitas anótanse sobre estas parcelas.

Cada cultivo é unha plantación concreta nunha parcela: especie e variedade, de onde vén a planta (viveiro, lote e pasaporte fitosanitario), cando se plantou e cando se colleita, canto se espera producir e canto se colleitou. Sobre el anótanse os tratamentos, abonados, regas, labores e colleitas, e a súa ficha reúne todo ese caderno co plan de abonado, o balance de auga e os custos. O planificador de campaña amosa nunha liña de tempo que ocupa cada parcela semana a semana, que ocos quedan libres e que rotacións repiten familia: a campaña enteira da finca nunha pantalla.

O rexistro de tratamentos fitosanitarios de todas as explotacións da cooperativa, que desde o 1 de xaneiro de 2027 ten que ser electrónico (Regulamento de Execución (UE) 2023/564 e RD 1311/2012, art. 16). Cada tratamento segue o seu ciclo: a recomendación do asesor coa súa xustificación de xestión integrada de pragas, a orde con data, aplicador e equipo, a aplicación rexistrada no campo e a validación con sinatura. Os produtos escóllense entre os usos autorizados do Rexistro de Produtos Fitosanitarios do MAPA para ese cultivo e esa praga, e a base de datos comproba, antes de deixar rexistrar, a dose, o n.º de aplicacións, o intervalo, que o produto siga vixente e sexa apto en ecolóxico, o carné do aplicador, a ITEAF do equipo e o stock do lote; calcula a cantidade que hai que preparar e o «colleitar desde» de cada parcela, que despois bloquea a colleita en Colleitas. Avisa ademais se o colleitado deixaría de valer para as esixencias de residuos dalgún cliente e se o modo de acción (IRAC, FRAC ou HRAC) se repite máis do recomendado. Ceres axuda a cumprir e deixa rexistro; a etiqueta do produto e o asesor mandan.

As achegas de nutrientes e materia orgánica de cada plantación (abonado de fondo, cobertura, fertirrigación, foliar e emendas) coas súas unidades fertilizantes por hectárea, e o plan de abonado de cada cultivo. Desde o 1 de xaneiro de 2026 cada achega anótase no caderno nun prazo dun mes, e desde o 1 de setembro de 2026 o plan de abonado é obrigatorio con carácter xeral (RD 1051/2022, arts. 4.1 e 4.2; en regadío non hai exención por tamaño). Ceres calcula as unidades fertilizantes ao gardar, desconta o abono do almacén, propón o plan a partir da produción esperada, o solo e a auga de rega, e avisa do límite de 170 kg de N orgánico por ha e ano en zona vulnerable (RD 47/2022), do plan superado e do prazo de anotación. O cálculo é orientativo: revísao o asesor.

As regas de cada plantación co seu volume, horas, contador e se levaron abono, e o balance hídrico que di canta auga necesitou o cultivo e canta recibiu. O RD 1051/2022 pide anotar as doses e datas de rega antes dun mes (art. 5.1.e) e o RD 1311/2012 os m³/ha e o nitróxeno da auga de cada rega (anexo III, C.l): Ceres calcula os m³/ha e o N que achega a auga cos nitratos da parcela, os mesmos que desconta o plan de abonado. O balance, coa estación da cooperativa, recomenda canto regar e déixao programado; é unha guía para decidir, non un programa de rega.

As labores culturais de cada plantación ou parcela (preparación do solo, sementeira, transplante, sachas, titorado, poda, arrinque…), programadas polo encargado e anotadas coas horas de cada persoa e da maquinaria. Co custo por hora de Persoal e Maquinaria sae o custo de man de obra e máquina de cada cultivo, sen teclealo dúas veces, e a axenda semanal reparte o traballo da cuadrilla. As cuadrillas ven o seu en A miña xornada e márcano como feito desde o móbil. A produción integrada pide anotar todas as operacións e prácticas de cultivo (RD 1201/2002, art. 5.d).

O traballo do técnico de campo na xestión integrada de pragas: os partes de visita co estado fenolóxico de cada cultivo e as pragas e enfermidades observadas fronte ao seu limiar de intervención, as trampas de seguimento coas súas capturas, a táboa de limiares e o buscador de solucións (cultivo + praga → produtos autorizados no Rexistro do MAPA). Cando unha observación supera o limiar, a visita pide recomendar un tratamento e créao coa xustificación xa escrita, que segue en Tratamentos. O buscador di o modo de acción de cada produto e, para unha plantación, cales alternan grupo co xa aplicado. Deixa constancia documental do asesoramento (RD 1311/2012, art. 11) e do seguimento de pragas que piden o Regulamento (CE) 852/2004 e a produción ecolóxica.

As análises de laboratorio da cooperativa e dos seus socios: solo, auga de rega, foliares, residuos de fitosanitarios (cada materia activa detectada fronte ao seu LMR) e microbiolóxicas, co laboratorio, o boletín anexo e unha valoración de cada parámetro para lelo dunha ollada. As análises de residuos consérvanse xunto ao rexistro de tratamentos (RD 1311/2012, art. 16.3) e saen na trazabilidade do lote; as de solo e auga alimentan o plan de abonado e o N da auga de rega. Nas de residuos, cada materia detectada leva o LMR vixente da UE para ese cultivo (EU Pesticides Database) e a súa porcentaxe, e Ceres di que clientes con prego de residuos non aceptarían o lote. Ceres non analiza residuos: compara o valor do boletín co LMR.

O que se recolle en cada plantación e chega á cooperativa. Cada colleita pésase no campo e crea o seu lote de campo (LC-…), que nace coa súa orixe —socio ou finca, parcela SIXPAC, cultivo— e coas certificacións desa parcela, e queda «Pendente de clasificar» ata que o almacén reparte os quilos en extra, categoría I, categoría II e refugo. Antes de rexistrar nada, Ceres mira o caderno da plantación: se un tratamento ten o prazo de seguridade en curso, a base de datos rexeita a colleita e di desde que día se poderá. É o primeiro elo do almacén e da trazabilidade, e a base das liquidacións aos socios.

O almacén da cooperativa lote a lote: os lotes de campo que chegan das colleitas (LC-…), os de produto comprado a terceiros (LE-…) e os confeccionados para a venda (LV-…), nas súas cámaras, coa súa categoría, as súas certificacións e o seu consumo preferente. As existencias só cambian cun movemento —colleita, compra, clasificación, confección, venda, mingua, inmobilización ou retirada— e todos quedan no historial do lote, con quen e cando. A confección pasa quilos dun ou varios lotes a un lote de venda sen mesturar ecolóxico con convencional, e cada lote ten a súa etiqueta cun QR á súa ficha pública. Para cada lote, Ceres di se vale para cada cliente con esixencias de residuos e por que non. É o elo que une as colleitas e as compras cos albarás.

O almacén de insumos por lote do fabricante: produtos fitosanitarios, fertilizantes, sementes e plantel, e organismos de control biolóxico (fauna auxiliar). Cada entrada crea un lote EI-… co seu lote de fabricante, provedor, albará e caducidade, e os tratamentos e as fertilizacións descóntano ao aplicarse: sábese que lote se botou en cada parcela e pódese rastrexar cara adiante ata os clientes. Avisa das caducidades e dos produtos cancelados no Rexistro de Produtos Fitosanitarios do MAPA que seguen en stock, e leva as entregas de envases baleiros co seu xustificante.

A carteira de clientes da cooperativa —tendas, restauración, grupos de consumo, distribución e mercados— co que cada un esixe e as condicións coas que se lle vende. Os requisitos non son unha nota á marxe: se un cliente só acepta produto ecolóxico, Ceres non deixa saír un albará cun lote convencional, e se esixe GLOBALG.A.P., avisa ao expedir. Os días de pagamento e o desconto aplícanse sós en pedidos, albarás e facturas. E se un cliente ten un prego de residuos —n.º máximo de materias, porcentaxe máxima do LMR, materias que non acepta, días de marxe sobre o prazo de seguridade—, Ceres di que lotes lle valen e o albará salta os que non. A ficha reúne nun só sitio o vendido, o pendente de cobro e que lotes chegaron a cada cliente: o «paso adiante» da trazabilidade que se necesita o día dunha retirada.

O ciclo comercial completo en catro lapelas —«Pedidos», «Previsión», «Albarás» e «Facturas»—, do pedido do cliente ao cobro. O albará non se escribe a man: sae do pedido cos lotes asignados por data de consumo (FEFO: primeiro o que antes vence), cada un coa súa orixe, a súa categoría e as súas certificacións, así que cada caixa sabe de que socio e parcela vén. Antes de cargar o camión Ceres repasa os lotes e o que esixe o cliente, e ao expedir desconta os quilos do almacén. A factura reúne os albarás dun cliente co IVE de cada produto, e a «Previsión» cruza a colleita esperada coa demanda para ver a tempo os ocos e o que queda por vender.

O produto que a cooperativa lles compra a terceiros para completar a súa oferta: froita, ovos, legumes, mel, pataca… Cada compra pídese e recíbese en Ceres, e ao recibila cada liña convértese nun lote externo coa súa orixe, o lote do provedor, a categoría e a certificación que a ampara: tan trazable como o produto dos socios. Ao recibir, Ceres comproba que o produto ecolóxico teña un certificado ecolóxico vixente do provedor e avisa se este non está homologado. E vixía o peso das operacións con terceiros fronte ao límite do 50 % da lei de cooperativas, como indicador orientativo para a asesoría.

Quen lle subministra á cooperativa: fitosanitarios, fertilizantes, sementes e planteis, servizos (o laboratorio), maquinaria e produto externo. De cada un, o seu número de rexistro (ROPO, RGSEAA, REGFER, REGA…), se está na lista de provedores aprobados que pide GLOBALG.A.P. e os seus certificados coa súa caducidade. Ceres avisa antes de que caduquen; os vixentes pasan aos lotes que se lle compran, e un certificado ecolóxico caducado impide recibir o seu produto ecolóxico. Desde a ficha vense as súas compras, os lotes que subministrou (e a cantos clientes chegaron) e os lotes de insumo que entraron no almacén.

O que a cooperativa lle paga a cada socio polo que entrega. Ceres calcula a liquidación soa a partir dos lotes de campo xa clasificados no almacén: os quilos de extra, primeira e segunda de cada lote ao prezo de liquidación da súa semana e da súa categoría, que fixa a cooperativa. Ao importe bruto réstalle os gastos de xestión, súmalle a compensación a tanto alzado do réxime especial da agricultura (REAGP, Lei 37/1992, art. 130) se o socio está nel e descóntalle a retención do IRPF, coas porcentaxes de Configuración que revisa a asesoría da cooperativa. Créanse en borrador para todos os socios dun período, emítense, páganse e entréganse en PDF; cada euro séguese ata o lote e a semana dos que sae, e o socio ve as súas desde a súa propia conta.

Responde en segundos ás dúas preguntas dun cliente, dunha inspección ou dunha alerta: de onde vén este produto? e a quen llo vendemos? Desde un lote, un albará, unha parcela, un cultivo, un tratamento, un lote de insumo, un fitosanitario ou un provedor, Ceres percorre un paso atrás —socio, parcela SIXPAC, cultivo, tratamentos co seu prazo de seguridade, abonados, rega, análises e insumos co seu provedor; ou provedor, compra e certificado— e un paso adiante —lotes confeccionados, albarás e clientes cos seus quilos—, e debúxao nun mapa. Desde aí lánzase un simulacro de retirada cronometrado, que deixa o rexistro anual que pide GLOBALG.A.P., e o QR de cada etiqueta abre a ficha pública do lote. Axuda a cumprir o artigo 18 do Regulamento (CE) 178/2002; a cadea é tan completa como o que se rexistrou.

Unha revisión continua do que a normativa lle pide a cada explotación e á cooperativa, feita co que xa está rexistrado en Ceres. Cada explotación ten unha puntuación con 16 comprobacións —prazos de anotación, validación e xustificación dos tratamentos, asesor, carnés, inspección de equipos, plan de abonado, zona vulnerable, análises, certificados, prazos de seguridade, simulacro anual e envases— que din que se comproba, por que (a norma) e como resolvelo. Prepara o caderno de explotación coa estrutura do anexo III do RD 1311/2012 en PDF, no formato do CUE (o JsonSchema do FEGA) e en JSON de Ceres, cada exportación co seu selo; «Verificar caderno» di se un ficheiro exportado segue íntegro e amosa a cadea de pegadas de todas as anotacións, e o envío ao SIEX queda preparado. Calcula ademais o balance de masas e o peso das operacións con terceiros e reúne o calendario normativo. Ceres axuda a cumprir e deixa rexistro: non está conectado ao SIEX (o envío queda preparado, non se envía), non é un caderno oficial e o titular segue a ser o responsable dos seus datos.

Nove informes listos sobre un período —a campaña en curso, a anterior, os últimos 12 meses ou unhas datas— para a xerencia, o consello reitor, a técnica e a oficina: rendemento por cultivo, entregas por socio, fitosanitarios usados, materias activas por hectárea, fertilización, auga de rega, transaccións de fitosanitarios, custos e marxe, e vendas. Cada un cos seus indicadores explicados (ⓘ), gráficos e táboas que se descargan para Excel, e cos mesmos permisos que o resto de Ceres: cada perfil ve os informes das súas seccións e os importes só quen pode velos. Para o que non estea previsto, a «Análise libre»: unha táboa dinámica sobre once fontes de datos que se garda como deseño para repetila.

Quen traballa no campo e con que habilitación: os traballadores da finca, do almacén e da oficina, os técnicos e asesores e os socios cos seus traballadores. De cada persoa, o seu carné de usuario profesional de produtos fitosanitarios —nivel, número e caducidade: vale 10 anos (RD 1311/2012, arts. 17-20)—, a súa inscrición no ROPO se asesora, as súas horas e o seu custo por hora. Ceres avisa antes de que caduque un carné e non deixa rexistrar como realizado un tratamento cun aplicador sen carné en vigor: é o dato que piden a inspección e a certificadora, e o que evita que un tratamento quede mal anotado por un papel caducado. As horas e o custo por hora alimentan o custo das labores e de cada cultivo.

Os tractores, os equipos de aplicación de fitosanitarios e os apeiros da cooperativa e dos socios, co que o caderno de explotación pide de cada equipo de aplicación: o seu número do ROMA (Rexistro Oficial de Maquinaria Agrícola) e a súa última inspección (RD 1311/2012, anexo III, parte I). Ceres segue a inspección técnica ITEAF —cada 3 anos desde 2020, RD 1702/2011, art. 5.7—, a calibración e o uso de cada equipo na campaña, avisa antes de que venza e non deixa rexistrar como realizado un tratamento cun equipo de inspección caducada ou desfavorable. Así non se descobre nunha auditoría que o pulverizador levaba meses sen pasala.